الثلاثاء، 13 مارس 2012
الثلاثاء، 26 يوليو 2011
مصر الجديدة (أنشودة الثورة)
دفع النهار مهر الصبية ونورت
طَرْحِتها فخر وعزَّة من غَزْل الولاد
دفع الولاد تمن القضية وزهَّرت
بساتينها طرحت ورد في كل البلاد
***
بدأت بأيام الضنا والدم سال
كنا افتكرنا ف وقتها البخت مال
لكن محال..!
أحفاد بناة المجد بين الأهرامات
رفضوا الخضوع .. كسروا السُّكات
شدوا القلوع .. رفعوا الهامات
وبدمهم ..!
هايحققوا الحلم اللي مات
***
دم الشهيد كان التمن
لكن ماراحش في يوم هدر
وهايبقى على مر الزمن
وهايشهد النيل والقمر
إن الولاد يوم ما تولد فيهم أمل
ثاورا على الظلم اللي كان غير محتمل
وقدموا الأرواح رخيصة في الميدان
كسروا زنازين السكوت ساعة الأدان
صلوا صلاة الحرب نصبوا المحكمة
رفعوا كفوفهم للسما
كانت بداية الملحمة
طلعت حروب الردة من جوة الصدور
خلوها ثورة ملهمة
صناعها من خيرة شباب الأمة بالوفاء
بالحب وبمعنى الفداء
وبالبطولة والإباء
رسموا طريقهم للعمار والكبرياء
قتلوا النفاق
***
سقطت قصور الخسة والشين والضلال
رحلت فلول الظلم والقهر اللي طال
وخلو مصر جديدة ف إيدين الملايكة
وصورتها في الوجدان وصدق الشعر فيها
ده الشعر لو أخرس هاينطق ويناديها
يا أم دنيتنا البريئة زدنا شوق
يا صانعة أنغام الحقيقة ف الشروق
يا دم غالي صار يلالي ف العروق
انتي المقام والوجهة والقبلة العزيزة
انتي اللي حبك جوة قلبي بالغريزة
يا أم فاطمة وعيشة يا صاحبة تريزة
جبناكي من بين الدمار للانتصار
جبناكي من لحظة مهانة واحتضار
شوفناكي شابة بين شطوط النهر طالعة
عشناكي كلمة بين ضلوع الكل والعة
وحلفنا ليكون الخلاص على إيد رضيعك
وحلفنا لازم ترجعي لحظة ربيعك
واهي جات خلاص
***
الفين سلامة يا طيبة
يا طيبة يا زينة البلاد
يا ضحكة صافية في وشوش العباد
الفين سلامة يا أمي يا أم الولاد
من بكرة بإيدين خلفتك تتكحلي
وتزهري وتنوري والرب حارسك
وعليه الاعتماد
الجمعة، 8 أبريل 2011
الأربعاء، 30 مارس 2011
الاثنين، 7 فبراير 2011
جيفــــــارا .. آت
يا ثورة ضايعة ومعني باهت
ومقاومة واقفة ف نُص ميل
يا صَحوة وسط الزحمة تاهت
مش لاقية سكة أو دليل
ياعيون ف عز الضلمة شافت
القَهر بات والليل ذليل
أشعار قديمة ف عقلي طافت
من نظم شاعرنا الجميل
بينعي ناس وتاريخها لافت
بيقول ”جيفارا مات“ قتيل
كانت كنوز لمعارفي ضافت
جلاد جيفارا مات ذليل
وجلادين من بعده خافت
ده الظلم أصلهُ بألف ديل
نزرع في شر بأصل ثابت
يطرح عذاب جيل بعد جيل
ده جواد جيفارا هامته عالية
و مد ثوري عيار تقيل
ومعاه زناد البندقية
فوق مدفعه مولَّع فتيل
ومات جيفارا ..!!!
وقالوا يومها .. ”جيفارا مات“
مرت سنين ....!
شفت ثوار ف الشوارع
وشفت أيضا ف الحارات
شفت المقاومة .. وشفت ضلمة
وشفت نور جاي من بعيد
وأتاريه جيفارا ...!!!
جنسيِّته .. فارس مُقاوِم
وقضيتِّه .. رفع المظالم
وساعتها بس قدرت أقول
جيفارا .. آت
جيفارا .. آت .. جيفارا .. آت
***
كتبت في مطلع 2008
مع خالص التحية والتقدير لأستاذي
الشاعر احمد فؤاد نجم
حــــَّداد البلد
من بعد يوم الغضب .. وخروج البركان
***
قفلوا الدكان
حرقوا الأركان
هربوا الأعيان
وسابوها بتنزف ..!
دم الغلبان
كلمة طِلعِت
بس مَخنوقة ف حشايا في انتظار لحظة خلاص
هيَّ لحظة وجَت خلاص
مِش هاتِطلع غير بإحساس من حَديد
إملى صِدرك بالهوا وشد الرحال
راح تلاقي يوم خلاصك أو تلاقي ليك مجال
أصل حدَّاد البلد .. سد كل سبيل يودِّي لأي كِير
خلُّوا كل أبوابها خالية أي حارس أوغفير
حزِّموها بخوف كبير
للخراب طَلَقُوا النفير
والسراب حَطّوه أمير
والجتت صبحت نحاس ..!
***
كُل صُبيان البلد .. قلعوا مَلطْ وصدَّرولهُا ضَهرُهم
آآآآآآآآآه ..!!
مين يداري لكل عيل سوئته ويشده من وسط النيران ..؟
مين يحسس كل بنت ف أرضها حبة أمان ..؟
لجل ما تحل الضفاير
لجل ما تبان البشاير
لجل ما تفتح شبابيك العَمَار
جوه حتَّة من الدَّمار
حِتَّة باين منها نور الإنفجار
نور بيعكس ضيه في عيون الشيطان
والشيطان .. فَقَدَ القرار
***
شياطين ..؟
لأ ..!
دول قراصنة وسرَّاقين ..!
سرَّاقين الحلم من أطفال شوارع من شقاها
صوَّرولهُم حِلمُهُم مدفون معاها
يوم ما وِلدِتهُم بُطون اليأس عصر الجاهلية
عصر كانت كل حاجة زي ماهيَّة
كنا شاريين القضية
كنا فاكرين المؤامرة متدارية
كنا كاتمين الآهات
وانهاردة نقول عصور النور .. ونملي الخمارات
مالية أركانها بنات الِّليل في أعتاب البَارات
كل حارة مؤامرات
ومهاترات ..!!!
***
هيَّ دي أيامنا هيَّ
واللي جوانا سراب
كنا فاكرينها صحيفة
أو رواية أو كتاب
له غلاف وف أوله بَسْمَلتُه حارس م العَذَاب
قطَّعوا كل الكُتُب ..!
غرَّقوها وطمسوا ليها كل مَعْلَم فيه إشارة أو دليل
طَوِّلوا ف العتمة ليل
سرقوا منها ومَوْتُولها كُل صاحب أو خليل
بس برضو محال يطول الِّليل وهيَّ مستعينة
مش حلاوة روح .. وأمي مش هاتفضل مستكينة
مش هاتستنى حزينة
مش هاتستنى سجينة
مش هاتستنى سجينة
***
الجمعة، 7 مايو 2010
الاثنين، 26 أكتوبر 2009
كلمتين فاضيين - أحدث أعمالي
إسبوعيا سنلتقي مع خاطرة جديدة من خواطري المجتمعية النقدية الساخرة .. ستكون في السياسة والاقتصاد والاجتماع وكل ما يهم المواطن المصري .. وستكون قصيرة في كلمتين .. لنفتح معا المناقشة والتحليل، وستكون جميع الخواطر بعنوان (كلمتين فاضيين).وهذا رابط (كلمتين فاضيين) علي الفيس بوك
http://www.facebook.com/group.php?gid=300413445471
السبت، 10 أكتوبر 2009
الاشتراك في:
الرسائل (Atom)