جيفــــــارا .. آت

يا ثورة ضايعة ومعني باهت

ومقاومة واقفة ف نُص ميل

يا صَحوة وسط الزحمة تاهت

مش لاقية سكة أو دليل

ياعيون ف عز الضلمة شافت

القَهر بات والليل ذليل

أشعار قديمة ف عقلي طافت

من نظم شاعرنا الجميل

بينعي ناس وتاريخها لافت

بيقول ”جيفارا مات“ قتيل

كانت كنوز لمعارفي ضافت

جلاد جيفارا مات ذليل

وجلادين من بعده خافت

ده الظلم أصلهُ بألف ديل

نزرع في شر بأصل ثابت

يطرح عذاب جيل بعد جيل

ده جواد جيفارا هامته عالية

و مد ثوري عيار تقيل

ومعاه زناد البندقية

فوق مدفعه مولَّع فتيل

ومات جيفارا ..!!!

وقالوا يومها .. ”جيفارا مات“

مرت سنين ....!

شفت ثوار ف الشوارع

وشفت أيضا ف الحارات

شفت المقاومة .. وشفت ضلمة

وشفت نور جاي من بعيد

وأتاريه جيفارا ...!!!

جنسيِّته .. فارس مُقاوِم

وقضيتِّه .. رفع المظالم

وساعتها بس قدرت أقول

جيفارا .. آت

جيفارا .. آت .. جيفارا .. آت

***

كتبت في مطلع 2008

مع خالص التحية والتقدير لأستاذي

الشاعر احمد فؤاد نجم

حــــَّداد البلد

من بعد يوم الغضب .. وخروج البركان

***

قفلوا الدكان

حرقوا الأركان

هربوا الأعيان

وسابوها بتنزف ..!

دم الغلبان

كلمة طِلعِت

بس مَخنوقة ف حشايا في انتظار لحظة خلاص

هيَّ لحظة وجَت خلاص

مِش هاتِطلع غير بإحساس من حَديد

إملى صِدرك بالهوا وشد الرحال

راح تلاقي يوم خلاصك أو تلاقي ليك مجال

أصل حدَّاد البلد .. سد كل سبيل يودِّي لأي كِير

خلُّوا كل أبوابها خالية أي حارس أوغفير

حزِّموها بخوف كبير

للخراب طَلَقُوا النفير

والسراب حَطّوه أمير

والجتت صبحت نحاس ..!

***

كُل صُبيان البلد .. قلعوا مَلطْ وصدَّرولهُا ضَهرُهم

آآآآآآآآآه ..!!

مين يداري لكل عيل سوئته ويشده من وسط النيران ..؟

مين يحسس كل بنت ف أرضها حبة أمان ..؟

لجل ما تحل الضفاير

لجل ما تبان البشاير

لجل ما تفتح شبابيك العَمَار

جوه حتَّة من الدَّمار

حِتَّة باين منها نور الإنفجار

نور بيعكس ضيه في عيون الشيطان

والشيطان .. فَقَدَ القرار

***

شياطين ..؟

لأ ..!

دول قراصنة وسرَّاقين ..!

سرَّاقين الحلم من أطفال شوارع من شقاها

صوَّرولهُم حِلمُهُم مدفون معاها

يوم ما وِلدِتهُم بُطون اليأس عصر الجاهلية

عصر كانت كل حاجة زي ماهيَّة

كنا شاريين القضية

كنا فاكرين المؤامرة متدارية

كنا كاتمين الآهات

وانهاردة نقول عصور النور .. ونملي الخمارات

مالية أركانها بنات الِّليل في أعتاب البَارات

كل حارة مؤامرات

ومهاترات ..!!!

***

هيَّ دي أيامنا هيَّ

واللي جوانا سراب

كنا فاكرينها صحيفة

أو رواية أو كتاب

له غلاف وف أوله بَسْمَلتُه حارس م العَذَاب

قطَّعوا كل الكُتُب ..!

غرَّقوها وطمسوا ليها كل مَعْلَم فيه إشارة أو دليل

طَوِّلوا ف العتمة ليل

سرقوا منها ومَوْتُولها كُل صاحب أو خليل

بس برضو محال يطول الِّليل وهيَّ مستعينة

مش حلاوة روح .. وأمي مش هاتفضل مستكينة

مش هاتستنى حزينة

مش هاتستنى سجينة

مش هاتستنى سجينة

***