خط الفقر

شُفت خطوط أشكال والوان
بس ما شُفتش خَط الفقر
نُص الشَّعب لقيته جعان
وبقيته بيشكي م القهر
وفساد ف بيوت الأعيان
وحرامي عنيه زي الصَّقر
ومرتَّب شحَّات غلبان
يخلص يوم إتنين في الشَّهر
وشباب عاطل فقري كمان
نفسه يحوِّش تمن المهر
نفسه يحس ف بلده أمان
ولا تحوجه ولا غربة وهجر
ويوماتي حكومة ببيان
شعبي حبيبي يُأمر أمر
نتبرع لبلدنا عشان
نبني لكُل مواطن قَبر
ف بلدنا أحراش وغيلان
تمنع حتي طلوع الفجر
وبتنشب ف قلوبنا نيران
ولا قادرين علي حتي الصبر
وعشان نعدل أي ميزان
ماتكفينا سنين الدهر
إمتي يحن علينا زمان
لجل ما نُعبُر خَط الفقر..؟
***

مــأذون عـــرفي

قرَّبوا يا شباب قرَّبوا يا بنات
مأذون عُرفي في كل الجامعات
في اليوم بيجوِّز ميَّة ميتين
وجوازته رخيصة بجوز جنهات
من غير لا شهود ولا كُتر كلام
مبروك وتعيشوا تبات ونبات
ورا شجر الجامعة وع الكورنيش
أوراق عُرفي بكُل المقاسات
والعيشة جميلة ومنع الحمل
موجود في جميع الأجزاخانات
ومادام في جواز يلزمله طلاق
جاهز مأذوننا لكل حالات
والشَّاطر هو اللِّي مايندم
علي غلطه في وقت من الأوقات
*****