زي كل سنة، بيهل علينا علي منصة المجلس الموقر - زي هلال العيد - السيد رئيس الوزارة عشان يقولنا بيان الحكومة ، وبيبدأ معاليه يشرح الانجازات والاخفاقات اللي عملتها الحكومة في سنتها حسب المادة 156 من الدستور، طبعا هاتقولولي انه عمره ما اتكلم عن إخفاقات، هاقولكم إن رئيس جهاز المحاسبات - الله يباركله - بيلحقه بالإخفاقات وبتبقي عركة ف خمارة وكرسي في الكلوب وبتقلب ضلمة، والصحافة بتاكل عيش فترة طويلة بعد الموضوع ده.الفكرة هنا مش في الانجازات ولا الإخفاقات خالص الفكرة في اللغة اللي بيتقال بيها بيان الحكومة، دستوريا المفروض إن البيان بيتقال قدام نواب المجلس اللي هما أساسا بيمثلوا الشعب، يعني بالنيابة عن الشعب بيوافقوا ع البيان وتصفيق حاد لصاحب البيان لو كانوا من حزب الحكومة ، أو يعترضوا ويعملوا غاغة لو من معارضين الأحرار.
وبما إن أغلب نواب الشعب ماحدش فيهم بيشوف دايرته إلا لما ييجي معاد الترشيح بتاع المرة اللي بعدها .. وبالتالي بيقعد الغلابة مش فاهمين حاجة من بيان الحكومة، واللي بيفهم البيان طشاش بيسمع عن انجازات نجف وآخر منجهة، ولما بيدور علي تأثيرها علي عيشته بيلاقي الأوضاع لا نجف ولا بتاع والعيشة زي الزفت والأحوال بتسوء كل يوم عن التاني.
طب ده للي بيفهم البيان طشاش .. طب إيه قولكم في الغلابة اللي مابيعرفوش يقروا ولا يكتبوا اللي قالت آخر التقارير إنهم نص شعب مصر ..؟ ومن الغلابة دول خالتي أم اسماعين البقَّالة اللي ساكنة في الدور الأرضي اللي خدت أوضة المسافرين وعملتها محل بقالة وبتبيع للناس من الشباك، وعملت للشباك حديد عشان السرقة بس للأسف المسافات بين سياخ الحديد كانت ضيقة يعني اللي عاوز علبة سمنة مثلا يضطر يلف ياخدها من الباب، المهم بدون الدخول في تفاصيل حياة خالتي أم اسماعين، متهيألي انه من حق أم اسماعين دي كمواطنة مصرية تعرف بيان الحكومة عاوز يقول إيه ..؟؟؟
أم اسماعين ست بسيطة ولو سألتها عن معلوماتها في الاقتصاد هاتعرف إن كل خلفيتها عن الاقتصاد أن "السلف تلف والرد خسارة" وان "الشكك ممنوع" وكل أملها في الدنيا انها تشيل الفراخ اللي مربياهم في الحمام و تعمل الحمام قيشاني زي أم بطة اللي جوزها بيشتغل في البحر.
وبالتالي إزاي واحدة زي خالتي أم اسماعين هاتفهم رئيس الحكومة وهو بيقول إن "معدل النمو بلغ 6.8 % ثم 7.1 % ثم 7.2% في الثلاث سنين اللي فاتت، وإن الاستثمارات الكلية اللي اتنفذت في العام المالي 2007 / 2008 وصلت 200 مليار جنيه بمعدل نمو 28 % عن العام اللي قبله، وإن زيادة معدلات الاستثمار وصلت 22 % من الناتج المحلى، وإن فائض ميزان المدفوعات 888 مليون دولار، وعجز الموازنة رجع من 8.2 % من الناتج المحلى لـ 6.8." %.
وإزاي أم اسماعين هاتفهم تقرير رئيس جهاز المحاسبات (الله يعمر بيته ويبعد عنه ولاد الحرام ويكفيه شر الطريق) اللي بيقول "أن الحكومة فشلت في تبنى أى سياسات ناجحة للنهوض بالتعليم والصحة وقطاعات مياه الشرب والصرف الصحي والإسكان، وإن ما تحقق لم ينعكس على الحياة اليومية للمواطنين من الأغلبية والفقراء ومحدودي الدخل وحتى الطبقة الوسطى لم يشعروا بأي إنجازات اقتصادية نتيجة عدم عدالة التوزيع".
بالذمة ممكن أم اسماعين تفهم الكلام ده كله؟ .. طبعا لاء ، وبكدة يبقوا سلبوا حق أم اسماعين الدستوري في الاطلاع والإحاطة ببيان الحكومة وخطة الموازنة العامة السنوية للدولة، ويبقي الحل بقي إن أم اسماعين تقعد مع نايب الدايرة عشان يشرحلها البيان وهي تبلغه بوجهة نظرها عشان يوصلها للمجلس، وبما إن العضو الموقر ماحدش بيشوفه؛ يبقي من الأفضل إن أم اسماعين تروح بنفسها المجلس الموقر وترد بقي علي بيان الحكومة بناء علي تعليمات السيد رئيس الجمهورية.
الفاتحة علي روحك يا خالتي أم اسماعين .. !!!
أصلها ماتت يوم 25 الماضي.
ليست هناك تعليقات:
إرسال تعليق