كلمتين فاضيين - أحدث أعمالي

إسبوعيا سنلتقي مع خاطرة جديدة من خواطري المجتمعية النقدية الساخرة .. ستكون في السياسة والاقتصاد والاجتماع وكل ما يهم المواطن المصري .. وستكون قصيرة في كلمتين .. لنفتح معا المناقشة والتحليل، وستكون جميع الخواطر بعنوان (كلمتين فاضيين).

وهذا رابط (كلمتين فاضيين) علي الفيس بوك
http://www.facebook.com/group.php?gid=300413445471

الفهلــــــوة

أم إسماعين .. وبيان الحكومة

زي كل سنة، بيهل علينا علي منصة المجلس الموقر - زي هلال العيد - السيد رئيس الوزارة عشان يقولنا بيان الحكومة ، وبيبدأ معاليه يشرح الانجازات والاخفاقات اللي عملتها الحكومة في سنتها حسب المادة 156 من الدستور، طبعا هاتقولولي انه عمره ما اتكلم عن إخفاقات، هاقولكم إن رئيس جهاز المحاسبات - الله يباركله - بيلحقه بالإخفاقات وبتبقي عركة ف خمارة وكرسي في الكلوب وبتقلب ضلمة، والصحافة بتاكل عيش فترة طويلة بعد الموضوع ده.

الفكرة هنا مش في الانجازات ولا الإخفاقات خالص الفكرة في اللغة اللي بيتقال بيها بيان الحكومة، دستوريا المفروض إن البيان بيتقال قدام نواب المجلس اللي هما أساسا بيمثلوا الشعب، يعني بالنيابة عن الشعب بيوافقوا ع البيان وتصفيق حاد لصاحب البيان لو كانوا من حزب الحكومة ، أو يعترضوا ويعملوا غاغة لو من معارضين الأحرار.

وبما إن أغلب نواب الشعب ماحدش فيهم بيشوف دايرته إلا لما ييجي معاد الترشيح بتاع المرة اللي بعدها .. وبالتالي بيقعد الغلابة مش فاهمين حاجة من بيان الحكومة، واللي بيفهم البيان طشاش بيسمع عن انجازات نجف وآخر منجهة، ولما بيدور علي تأثيرها علي عيشته بيلاقي الأوضاع لا نجف ولا بتاع والعيشة زي الزفت والأحوال بتسوء كل يوم عن التاني.

طب ده للي بيفهم البيان طشاش .. طب إيه قولكم في الغلابة اللي مابيعرفوش يقروا ولا يكتبوا اللي قالت آخر التقارير إنهم نص شعب مصر ..؟ ومن الغلابة دول خالتي أم اسماعين البقَّالة اللي ساكنة في الدور الأرضي اللي خدت أوضة المسافرين وعملتها محل بقالة وبتبيع للناس من الشباك، وعملت للشباك حديد عشان السرقة بس للأسف المسافات بين سياخ الحديد كانت ضيقة يعني اللي عاوز علبة سمنة مثلا يضطر يلف ياخدها من الباب، المهم بدون الدخول في تفاصيل حياة خالتي أم اسماعين، متهيألي انه من حق أم اسماعين دي كمواطنة مصرية تعرف بيان الحكومة عاوز يقول إيه ..؟؟؟

أم اسماعين ست بسيطة ولو سألتها عن معلوماتها في الاقتصاد هاتعرف إن كل خلفيتها عن الاقتصاد أن "السلف تلف والرد خسارة" وان "الشكك ممنوع" وكل أملها في الدنيا انها تشيل الفراخ اللي مربياهم في الحمام و تعمل الحمام قيشاني زي أم بطة اللي جوزها بيشتغل في البحر.

وبالتالي إزاي واحدة زي خالتي أم اسماعين هاتفهم رئيس الحكومة وهو بيقول إن "معدل النمو بلغ 6.8 % ثم 7.1 % ثم 7.2% في الثلاث سنين اللي فاتت، وإن الاستثمارات الكلية اللي اتنفذت في العام المالي 2007 / 2008 وصلت 200 مليار جنيه بمعدل نمو 28 % عن العام اللي قبله، وإن زيادة معدلات الاستثمار وصلت 22 % من الناتج المحلى، وإن فائض ميزان المدفوعات 888 مليون دولار، وعجز الموازنة رجع من 8.2 % من الناتج المحلى لـ 6.8." %.

وإزاي أم اسماعين هاتفهم تقرير رئيس جهاز المحاسبات (الله يعمر بيته ويبعد عنه ولاد الحرام ويكفيه شر الطريق) اللي بيقول "أن الحكومة فشلت في تبنى أى سياسات ناجحة للنهوض بالتعليم والصحة وقطاعات مياه الشرب والصرف الصحي والإسكان، وإن ما تحقق لم ينعكس على الحياة اليومية للمواطنين من الأغلبية والفقراء ومحدودي الدخل وحتى الطبقة الوسطى لم يشعروا بأي إنجازات اقتصادية نتيجة عدم عدالة التوزيع".
بالذمة ممكن أم اسماعين تفهم الكلام ده كله؟ .. طبعا لاء ، وبكدة يبقوا سلبوا حق أم اسماعين الدستوري في الاطلاع والإحاطة ببيان الحكومة وخطة الموازنة العامة السنوية للدولة، ويبقي الحل بقي إن أم اسماعين تقعد مع نايب الدايرة عشان يشرحلها البيان وهي تبلغه بوجهة نظرها عشان يوصلها للمجلس، وبما إن العضو الموقر ماحدش بيشوفه؛ يبقي من الأفضل إن أم اسماعين تروح بنفسها المجلس الموقر وترد بقي علي بيان الحكومة بناء علي تعليمات السيد رئيس الجمهورية.

الفاتحة علي روحك يا خالتي أم اسماعين .. !!!
أصلها ماتت يوم 25 الماضي.

بلكونات بريطانيا العظمى

في بلد الفساد

(1)

في العتمة طلَّة بنورك
تهديلنا لحظة ميلاد
ياللي راياتك أبيَّة
ف الغنوة والإنشاد
إنتي اللي عظمة جنودك
مذكورة في الإسناد
والخير محاوط وفايض
في الصحرا وف كل واد
والعلم سايد ربوعك
برفـــاعة والعقَّـــــاد
طول عمر فاتْحِة كتابك
القوت .. ولينا الزَّاد
دلوقتي ضلِّت طريقها
في شوارعك الأوغاد
قَلَبوا نهارك لضلمة
زادوا الفساد بفساد

(2)

بنتك يا مصر العتيقة
رمز العفاف للبلاد
بُرقُعها صاين شرفها
لولادها والأحفاد
بعد اللي طالبوا بحقوقها
ونادولها بالأمجاد
ظهروا اللي كشفوا شعورها
ونهودها والافخاد
تسأل يقولك روايةإ
بداع .. وغير معتاد

(3)

وصاحبنا كاتب ينادي
دي بلدنا بلد الولاد
أنا كنت فاكر ولادك ..!!
(......)
طلعوا ولاد في ولاد
واتاريها دعوة خبيثة
منشورة للإفساد
كشفت دعاوي خفية
للكفر والإلحاد
ليه طفوا نورك وقتلوا
الحق .. والشر ساد
وازاي يا أم العروبة
مهد الرسل والعباد
من بعد توهة ولادك
بقيتي بلد الولاد
***

لحظة رجعتي

شكر خاص للاستاذة / شيماء الجيزي صاحبة الاداء المتميز

الفهلــوة

مَخَاليق غلابة طالعة تسعي في البُكور
لفحتها شَمس واحدة والوجه اكتوي
وقريت وشوشهم يمكن القي السر فيها
ولقيت جباههم ليها نفس المُحتوي
وطريقها صَعب وكل حِتَّة حارة سَد
لكن إيدهم في الإيدين ماشيين سوا
وصحاري صفرا والغيطان شاقَّة بخَضَار
والجِدر من عَرَق الفقير أصلهُ ارتوي
والريح تصَفَّر تيجي تِكنس كُل حَي
تسمع خلالها ف كُل لحظة ديب عوا
دول شيَّاطين الشَّر طالعين م الجُحور
ماشية في طريقها بس ماشية بلولوة
والمَكر طالل م العيون الدَّبلانين
مَلو الإيدين والشَّر طاير في الهوا
تسأل عليهم تلقي شِلِّة نصابين
منهج حياتهم مُختصر في الفهلوة
حرامية تسرق م العيون ميت الف عين
الكُحل يمكن تبقي نَفس المُستوي
وحَلَنجي له الوان في وشُّه قول ميتين
والبهلوان تجري في دمُّه البَهلوة
ضاع الوفا والدُّنيا صَبَحت فرقتين
حفنة كلاب شُغلتها اصلاً هوهوة
وملايكة عودها كالوتد ثابت تشوفهُ
في الطين لكنه م الجفاف ساقُه التوي
عَجَبي علي دُنيا تساع كل القُلوب
اللِّي إرتضي .. واللِّي بزُخْرُفها إغتَوي
*****

لحظــة رَجعتي

مستني لحظة رجعتي
وف عِز فجر الصيف أشوفك ترسمي
صورة وطن وهواه يبرد لوعتي
***
مستني لحظة رجعتي
للنيل وأسفلت الشوارع والزحام
دول كانوا دايماً جوه قلبي ف غربتي
***
مستني لحظة رجعتي
بعد العذاب في الغربة وسنين الحنين
حضنك يا بلدي هو بيتي وسكتي
***
مستني لحظة رجعتي
طالب تسمحي وتغفري ليا البُعاد
طول عمري إبنك وإنتي عشقي وكلمتي
***
مستني لحظة رجعتي
لبيوت قديمة شايلة جواها التاريخ
فيها بدايتي وفيها حبي وغنوتي
***
مستني لحظة رجعتي
أنوار جوامعك والكنايس كانوا دايماً
قناديل طريقي وفي السبيل كانوا شمعتي
***
مستني لحظة رجعتي
لصحن فول شايل هموم كُل القلوب
والصبر دايماً كُنت شايله ف خزنتي
***
مستني لحظة رجعتي
كلمة أخيرة بقولها
حُبِّك في قَلبي يابلدي مهما بعدت عنِّك
إنتي حبيبتي وأمي وإنتي سَلوتي
مستني لحظة رجعتي
***

حبيب العمر - من وحي التجربة

(1)

أنا والغُربـة والبَحـر اللـي مالـه بـَـر

فـي نَـار العِشق.. بكَّاني وسقَاني المُر

صُبُـرت كتيـر وما باقي في قلبي صَبر

وِشِـقْت كتيـر وماباقي في عُمري عُمْر

وضَاع أمَلي وشُفت نجوم في عِز الضُهر

(2)

وكـان عِشقـي وكان حُبي

وكـان مَعَ قَلبي يُأمُـر أمْر

وكان يروينــي من عَطْفُه

وكان في حَنَانـه زي النَّـهر

عِشقتُه وكان بـدون عِنوان

وكان مالي عليَّا الدَّهـر

سَافِرت عَشَان يِحِسْ أمَان

عشان أرجع في جيبي المَهر

رجعت إليــه عشان أفْدِيه

سَبَقني إليه وضَمهُ القَبـر

وسَابني لوحْدي في عَذَابي

تَِرَِكني أدوق نِيَران الهَجـر

وصَــــار جَـرحي ملاَزمِْني

وقُلت يَاريتـهُ منـي يِفِـْر

وفَات الحُب مني ورَاح

وراح مني حَبيـب العُمـر

ومَات الحِـلم جُـوايا

وسابلي جـراح وأكبر سِـرّ

بقََالي عَـام مابـَعـرف أنـام

وحُــزن كبير وجَـرح أمَــــرّ

وتاني مشيت ورُحت وجيت

وقُلت يـاريت يعـود الفَجـر

وزير الاشغال

فضائية بلدك بتقدم
للشعب بطاقة أحوال
الفيلم الكوميدي التراجيدي
للمخرج مدحت عبعال
تقديم الشركة المتحدة
والمنتج عبده البقال
عن نايب شاطر ومطأطأ
فلاح متجوز بعيال
والكورة دي أصلا شغلانته
وحاليا دستة أشغال
تلاقيه أوقات عضو ف مجلس
طبعا .. عقبال الأنجال
وحصانته ف جيبه بتحميه
تتهمه .. يقولك: مين قال..؟
وبيلبس كنجوم السيما
وساعات كرجال الأعمال
له طبعا في الحزب مكانة
وفلوسه بتملالها شوال
ويوماتي يذيعلك في برامج
تسمع في كلامه الأهوال
مسنود بمناصب م العالية
ولا يمكن أبدا يتشال
بكرة نشوفه ممثل سيما
أو مطرب ينتع موال
أو قاضي ف نقض ولا استئناف
أو حتي وزير الأشغال
وختام الفيلم يا حضرات
حتما هايكيد العزَّال
***

خط الفقر

شُفت خطوط أشكال والوان
بس ما شُفتش خَط الفقر
نُص الشَّعب لقيته جعان
وبقيته بيشكي م القهر
وفساد ف بيوت الأعيان
وحرامي عنيه زي الصَّقر
ومرتَّب شحَّات غلبان
يخلص يوم إتنين في الشَّهر
وشباب عاطل فقري كمان
نفسه يحوِّش تمن المهر
نفسه يحس ف بلده أمان
ولا تحوجه ولا غربة وهجر
ويوماتي حكومة ببيان
شعبي حبيبي يُأمر أمر
نتبرع لبلدنا عشان
نبني لكُل مواطن قَبر
ف بلدنا أحراش وغيلان
تمنع حتي طلوع الفجر
وبتنشب ف قلوبنا نيران
ولا قادرين علي حتي الصبر
وعشان نعدل أي ميزان
ماتكفينا سنين الدهر
إمتي يحن علينا زمان
لجل ما نُعبُر خَط الفقر..؟
***

مــأذون عـــرفي

قرَّبوا يا شباب قرَّبوا يا بنات
مأذون عُرفي في كل الجامعات
في اليوم بيجوِّز ميَّة ميتين
وجوازته رخيصة بجوز جنهات
من غير لا شهود ولا كُتر كلام
مبروك وتعيشوا تبات ونبات
ورا شجر الجامعة وع الكورنيش
أوراق عُرفي بكُل المقاسات
والعيشة جميلة ومنع الحمل
موجود في جميع الأجزاخانات
ومادام في جواز يلزمله طلاق
جاهز مأذوننا لكل حالات
والشَّاطر هو اللِّي مايندم
علي غلطه في وقت من الأوقات
*****

ويَّا الحمام .. خيالي ومعشوقتي

بهرني تعلقها بنقاء الطيور ... سحرني حبها لاجنحة ترفرف فيرفرف معها القلب بين جانبي الصدر .. اخذتني حالتها بعيدا الي قلمي ليكتب وحده .. معشوقتي ويا الحمام ..!!!

(1)
فِي الفَجر والشَّمس الجَميلة ف مَهدها
لَمَحت عُيوني صَبيَّة زى بَدر البُدور
بين الغِيطَان كَانت وَحِيدَة لكنَّها
مِتْوَنِّسَة ومِسْتَأنِسَة بصوت الطُيور
ويَّا الحَمام والخير محَاوِط قَلبَهَا
ليهَا إبْتِسَامَة بتترسِم تِشْفِي الصُدُور
تِوْهِبْلُه مِن نَبع الوَفَا ومن حُبِّها
تَاكُل مَعَاه وتْأكِّله بكُل السُرور
وتوَشْوِشُه وتِسْتَنَّي رَدُّه لأنها
بتفهمِّه وتكلِّمه ف كُل الأُمور
ويَّا الغُروب تلمَحْهَا واخدة ف حُضْنَهَا
أجْمل حَمَامَة وزيَّها زَي بِنْت حُور
صَار الحَمَام هُّو غَرَامها وعِشْقَهَا
كَان ليهَا أفْضَل مِن حَنَان فَارسْ جَسُور
كَانت تِنَام ويَّا الحَمَام في حُضْنَها
تُشْعُر في أعْمَاق قَلبَهَا أجْمَل شُعور
سَاعة تكُون ويَّا طُيورهَا ف عِشَّها
بأَمَان تِحِسْ ودِفْء أجْمَل م القُصُور

(2)
فَاتت سِنين ولَقِيتْهَا قَاعْدَة لوَحْدَهَا
مِنْ غِير حَمَام
مِنْ غير حَنَان
مِنْ غِير طُيور
وسَألتَهَا ... !!
وَحيِدَة ليِه فِي حُزنها ..؟
قَالِتْلِي بَحْلَم مِن يُومِيهَا بطير يزُور
قَلبي وتِرجَع ليَّا بَسمة فَقَدتَهَا
يُوم اللَّيالي مَا فَرَّقِت بين قَلبي
ومَابين الطُيور
***

صدور الطبعة الثانية من ديوان (بلكونات بريطانيا العظمي) حاليا بمعرض الاسكندرية للكتاب وحتي 22 فبراير الجاري

اصدقائي الاعزاء

صدرت مؤخرا الطبعة الثانية من ديواني الاول بعنوان (بلكونات بريطانيا العظمي) عن دار اكتب للنشر والتوزيع.

اشكر دار اكتب ومديرها الاستاذ يحي هاشم علي المجهود المبذول من اجل صدور الديوان، وعلي الرغم من انه لم يلحق بمعرض الكتاب الا انه قد يكون من حسن الطالع وذلك لعدم وجودي بمصر الان.

الديوان موجود الان بمنافذ دار اكتب بالقاهرة والمحافظات علي النحو التالي:-

القاهرة

عمر بوك ستورز - 15 ش طلعت حرب – أعلى مطعم فلفله – 0103361217

مكتبة البلد - 31 ش محمد محمود . التحرير . أمام الجامعة الأمريكية - 27922768

نون للنشر والتوزيع – 12117 ش السد العالي . ميدان فيني . الدقي - 37601041

مكتبه ليلى – 17 شارع جواد حسنى من شارع قصر النيل – 23934402

مكتبة آفاق – 75شارع القصر . أمام دار الحكمة -27953811

مكتبه ديوان – 159 ش 26يوليو . الزمالك -37362582

مكتبة الحرية .. شارع محمد بك عاصم من ش شبرا .. بجوار السعد مول

مكتبات الشروق

وسط البلد:1 ميدان طلعت حرب وسط البلد – القاهرةتليفون: 3912480 - 39306432-

مصر الجديدة:15 شارع بغداد - الكوربةتليفون: 24171945 - 241719443-

مدينة نصر:سيتى ستارز مول - الدور الأولتليفون: 24802544

الجيزة: فرست مول – 35 شارع الجيزةتليفون:5735035 - 5685187

الاسكندرية : سان ستيفانو مولتليفون: 4690370/03- 1633685/0102-

الإسكندرية

معرض الكتاب السكندري:شارع صفية زغلول – امام ماكدونالدز – محطة الرمل

مكتبة سونة بمحطة الرمل :أ. سونةالعنوان : صينية محطة الرمل بجوار فيشار جوجوت : 0124609082

مكتبة روايات الشبابأ.محمد قطبرقم 67 ش مسلم بن الوليد - الموازى لمصطفى كامل – محطة قطار السوقت: 0121731008 ،

مكتبة أمير : خلف سينما أمير – محطة الرمل3

المنصورة

بوكس اند بينز – المنصورة : ش جزيرة الورد أمام نادى الجزيرة – 2242285/0504-

بورسعيد

مكتبة درغام - ش صفية زغلول - بجوار فندق انتركونتننتال - 01136999035-

طنطا

المكتبة القوميةمكتبة العز خلف سينما مصرمكتبة الصحافة بشارع أبو فريخة

الدول العربية ودول الخليج

الدار الوطنية الجديدة - السعودية

ومرحبا بنقدكم البناء

ولكم تحياتى